Кога ќе платите речиси 150 долари за празничен подарок од брендот на Ким Кардашијан, веројатно очекувате нешто посебно. Но, наместо луксузни изненадувања, дел од купувачите добиле ластичиња за коса, шноли, приврзоци и прерамки за градник. Резултатот? Видео со повеќе од 34 милиони прегледи и интернет што не престанува да се смее.
Ким Кардашијан повторно е во центарот на вниманието, но овојпат причината не е нејзиниот изглед, нова модна колекција или љубовниот живот. Нејзиниот бренд SKIMS претстави празничен календар со 12 изненадувања, кој чини 148 долари, а неговата содржина предизвика лавина од негативни реакции на социјалните мрежи.
Сè започна кога корисничка на ТикТок реши пред камерата да го отвори календарот, преграда по преграда, и да им покаже на следбениците што навистина се крие во луксузното пакување.
Со секое ново отворање нејзиното воодушевување се намалуваше, а разочарувањето стануваше сè поочигледно.
Меѓу „изненадувањата“ се најдоа ластичиња за коса, шноли, приврзоци за клучеви, чешел, прерамки за градник и мала играчка од пена за стискање.
Сосема обични ситници, барем според бројните коментатори, за кои цената од речиси 150 долари е сè освен обична.
„Ова е сè што ми паѓа меѓу седиштата во автомобилот“
Интернетот, се разбира, не пропушти можност за шега.
Еден корисник напиша дека содржината на календарот потсетува на работите што му се собираат меѓу автомобилските седишта, додека друг го спореди со предмети што неодамна ги исфрлил од ноќното шкафче.
Имаше и такви што пресметаа дека сите производи заедно, според нивната процена, не вредат повеќе од дваесетина долари.
Особено духовит беше коментарот дека календарот повеќе личи на кутија со шеги отколку на луксузен празничен подарок.
Некои дури ѝ се заблагодарија на девојката што го снимила видеото, тврдејќи дека со својата искреност им заштедила пари на илјадници потенцијални купувачи.
Но, дали Ким навистина ги измамила купувачите?
Тука приказната добива поинаква страна.
На официјалната страница на SKIMS производот е претставен како празничен календар со модни додатоци, а не како пакет со облека, долна облека или скапоцени подароци.
Во описот однапред се најавени додатоци за коса, приврзоци и други секојдневни ситници. Значи, брендот во основа го испорачал она што го рекламирал.
Проблемот, според критичарите, не е толку во содржината колку во цената и очекувањата што ги создава едно луксузно пакување со потписот на Ким Кардашијан.
И токму тука се отвора старото прашање на современата мода: колку плаќаме за самиот производ, а колку за името што стои зад него?
Ким Кардашијан одамна докажа дека умее да претвори речиси сè во успешен бизнис. Но, овојпат изгледа дека најголемото изненадување во празничната кутија не се ластичињата и приврзоците.
Најголемото изненадување е цената.
WEDDING EXPO SKOPJE 2027 – ТРИ ДЕНА МОДА, ГЛАМУР И ГОЛЕМ СВАДБЕН СПЕКТАКЛ!
About The Author
