Фустанот што за малку никогаш немаше да го видиме: Тајната зад венчаницата на Џеки Кенеди
На 12 септември 1953 година, Жаклин Бувие зачекори кон олтарот за да му каже „да“ на тогашниот сенатор Џон Ф. Кенеди. Фотографиите од свадбата ќе влезат во историјата, а нејзината раскошна венчаница ќе стане еден од најпрепознатливите невестински фустани на XX век.
Но зад совршената фотографија се крие приказна која звучи речиси како филмско сценарио.
Венчаницата била дело на Ен Лоу, исклучителна американска кутуриерка која ги облекувала некои од најбогатите семејства во Америка, меѓу кои Рокфелерови, Рузвелтови и Дупонт. И покрај тоа, нејзиното име речиси и да не било спомнато во тогашните извештаи за свадбата на Кенеди. Денес таа се смета за една од значајните фигури во американската модна историја. 
Фустан направен од повеќе од 45 метри свила
Венчаницата била изработена од околу 50 јарди свилена тафта, во боја на слонова коска. Имала нагласено „portrait“ деколте, тесно обликуван горен дел и огромно волуменозно здолниште украсено со рачно изработени розети и мали восочни цветови. Под здолништето бил сошиен и мал син машничест детал – дискретното „нешто сино“ на невестата.
Интересно е што ваквата раскошна силуета наводно не била првиот избор на Џеки. Таа преферирала почист, поедноставен и поевропски изглед, но семејството Кенеди сакало нејзиното појавување да има многу поголема визуелна тежина.
И навистина ја имало.
А потоа – катастрофа
Само десетина дена пред свадбата, во студиото на Ен Лоу пукнала водоводна цевка.
Водата ја уништила венчаницата и голем дел од фустаните за деверушите.
Работата за која биле потребни недели одеднаш морала да се повтори за само неколку дена. Лоу и нејзиниот тим работеле речиси без престан и успеале повторно да ја создадат венчаницата навреме. Според Smithsonian, само главниот фустан, кој првично бил изработуван околу осум недели, бил повторно направен за пет дена.
На крајот дизајнерката не само што не заработила, туку претрпела загуба од околу 2.200 долари во тогашна вредност, трошок што не му го префрлила на семејството Кенеди.
Wedding Expo Skopje 2027 – 15 години љубов, стил и инспирација.
73 години подоцна – сè уште изгледа како венчаница од бајките
Можеби токму затоа ова не е само приказна за фустан.
Тоа е приказна за една невеста која ќе стане светска модна икона, за една венчавка која ќе остане запаметена со генерации – и за една неверојатно талентирана дизајнерка чие име предолго останало во сенка.
Оригиналната венчаница денес се чува во John F. Kennedy Presidential Library and Museum, но поради нејзината кревкост веќе не се изложува редовно. 
А кога ќе ја погледнете 73 години подоцна, тешко е да не се согласите: трендовите поминуваат, но вистинската венчаница може да стане историја.
About The Author
