Мадона се враќа по 23 години, Тејлор Свифт пишува историја: Вечерва е големата ноќ на MTV VMA
Една од најголемите музички вечери во годината пристигнува вечерва во Лос Анџелес, а во центарот на вниманието се две жени кои веќе одамна ја променија поп-културата – Мадона и Тејлор Свифт.
MTV Video Music Awards 2026 ќе се одржат во Peacock Theater, а годинашното издание носи неколку моменти кои уште пред почетокот му обезбедија историски статус.
Мадона е најноминираната ѕвезда на вечерта со вкупно 13 номинации, меѓу кои и за видео и изведувач на годината. Но уште поголемо внимание предизвикува нејзиното враќање на сцената на VMA.
Кралицата на попот ќе ја отвори церемонијата, што ќе биде нејзин прв настап на MTV VMA по цели 23 години. За артист чија кариера е речиси неразделна од историјата на MTV, враќањето на оваа сцена е еден од најочекуваните моменти на вечерта.
Тејлор Свифт влегува во историјата
И Тејлор Свифт има причина оваа вечер долго да ја памети.
MTV годинава за првпат ја воведува наградата Artist Director Honors, а нејзин прв добитник ќе биде токму Свифт – признание за нејзината работа зад камерата и влијанието што го има врз современиот музички видеоспот и визуелното раскажување.
Со новото признание, Тејлор ќе стигне до 31 VMA награда, со што дополнително го зацврстува своето место во историјата на манифестацијата.
Таа годинава има и 11 номинации, а вечерта ќе донесе уште едно изненадување за нејзините фанови.
На VMA ќе биде прикажана светската премиера на видеоспотот за нејзиниот нов сингл „Patient Zero“, кој самата го режираше. Во видеото се појавуваат и холивудските ѕвезди Колин Фарел и Дакота Џонсон, додека зад камерата е оскаровецот Емануел Лубецки.
Снуп Дог домаќин, голема листа на настапи
Домаќин на годинашните VMA ќе биде Снуп Дог, а покрај Мадона на сцената се најавени LISA, RAYE, Shaboozey, Gunna, GENER8ION, Yung Lean и Sienna Spiro.
По Мадона и Тејлор Свифт, меѓу артистите со најмногу номинации се Сабрина Карпентер, Аријана Гранде и Бруно Марс.
Церемонијата започнува во 19:30 часот по американско источно време, што за Македонија значи 1:30 часот по полноќ, во ноќта меѓу недела и понеделник.
Ако некогаш MTV VMA живееше од моментите за кои следното утро зборуваше целиот свет, годинава има сè што е потребно тоа повторно да се случи.