Три ракометари, три прстени и три судбоносни „ДА“!
Три прстени, три судбоносни „ДА“: Македонските ракометари постигнаа голови за цел живот
Изминатиов викенд љубовта беше најубавиот победник, а тројца македонски ракометари наместо на теренот – клекнаа на колено на плажа и ги побараа своите сакани за сопруги.
Мартин Серафимов, Иван Џонов и Дејан Кукуловски речиси истовремено отворија ново и можеби најважно поглавје во своите животи, а романтичните фотографии од запросувањата веднаш привлекоа големо внимание на социјалните мрежи.
Поранешниот македонски репрезентативец Мартин Серафимов ја запроси некогашната ракометарка Јана Калајџиевска на плажа во Грција. Романтичната атмосфера, морето и зајдисонцето биле совршена сцена за прашањето на кое Јана одговорила со судбоносното „ДА“.
На колено клекна и македонскиот репрезентативец и ракометар на Алкалоид, Иван Џонов. Тој ја побара за сопруга својата девојка Марија Димитровска, а среќниот пар сподели прекрасни фотографии од емотивниот момент покрај морето.
Третиот прстен викендов го подари младиот ракометар на Ресен, Дејан Кукуловски. Тој ја изненади својата сакана Анастасија Бошнакоска на плажа, каде што клекна на колено и го постави најважното прашање.
Очигледно, летото е сезона на љубовта, а македонските ракометари покажаа дека освен голови на теренот, знаат да постигнат и гол директно во срцето.
На трите идни брачни двојки им посакуваме многу љубов, среќа и незаборавни моменти на патот кон свадбениот ден.
About The Author
