Чикаго ја покажа невестата на 2027: корсети, проѕирност, бисери и венчаници што се менуваат
Еден од најважните bridal саеми во Америка, National Bridal Market Chicago, штотуку ги затвори вратите по тридневното издание од 16 до 18 август, а новите колекции веќе даваат прилично јасна слика за тоа како ќе изгледа невестата во 2027 година. На саемот учествуваа стотици брендови, меѓу кои Calla Blanche, Oksana Mukha, Lazaro, Ricca Sposa, Calista Couture, Vladiyan Royal, Peter Langner и многу други.
Ако треба да се избере еден збор за новата bridal сезона, тоа би бил корсетот. Конструкцијата повторно е во центарот на вниманието – издолжени корсети, нагласена половина и прецизно обликувани силуети што потсетуваат на висока мода, но остануваат романтични.
Кај новата колекција Lumière Héritage на Oksana Mukha, која беше претставена и пред американските партнери во Чикаго, се среќаваат архитектонски форми со Chantilly тантела, рачен вез, бисери, апликации и Swarovski кристали. Проѕирните детали и слоевите од тул и шифон ја омекнуваат строгата конструкција на корсетите.
Бисерите и кристалите остануваат, но во 2027 не изгледаат како декорација додадена на фустанот. Тие ја следат линијата на телото и стануваат дел од самата конструкција на венчаницата.
Друг силен тренд е проѕирноста – sheer корсети, транспарентни ракави и деликатна тантела која открива кожа, но без да ја изгуби bridal елеганцијата.
Од друга страна, класиката не исчезнува. Calla Blanche во актуелните колекции силно ги истакнува богатата тантела, светкавите детали, ниските грбови и драматичните силуети, но и венчаниците со одвојливи здолништа, ракави и наметки.
Токму трансформацијата на венчаницата е еден од најпрактичните трендови: невестата може да влезе на церемонијата со големо здолниште или наметка, а за забавата да ги отстрани и за неколку секунди да добие сосема нов изглед.
Сè повеќе внимание добива и вториот bridal look – пократок фустан, комбинезон или поедноставна и посекси варијанта за забавата по официјалниот дел.
Пораката од Чикаго е јасна: невестата на 2027 нема да избира само една венчаница, туку изглед што може да се менува заедно со свадбата. Корсети, тантела, бисери, кристали и драматични детали остануваат, но со многу повеќе индивидуалност и можност за трансформација.
Од Чикаго до Скопје
Дел од светските bridal трендови за 2027 ќе ги следиме и на 15. јубилеен Wedding Expo Skopje, кој ќе се одржи од 19 до 21 февруари 2027 година.
Посебна врска меѓу Чикаго и нашиот саем има и Monsolo Couture – бренд кој пред неколку години се претставуваше токму на National Bridal Market Chicago, а веќе неколку години е редовен дел и од Wedding Expo Skopje.
Тоа е уште еден доказ дека трендовите што денес се претставуваат на големите светски bridal пазари, многу брзо стигнуваат и до македонските невести. На Wedding Expo повторно на едно место ќе се сретнат новите колекции, домашните bridal брендови, свадбените професионалци и идните младенци.
About The Author
