Една од најпопуларните актерки на денешницата снимила сцена за долгоочекуваното продолжение, но публиката сепак нема да ја види во финалната верзија.
Долгоочекуваното продолжение на култниот филм „Ѓаволот носи Прада“ уште пред премиерата успеа да крене прашина. Според информациите на Entertainment Weekly, камео-сцената на актерката Сидни Свини е целосно исфрлена од финалната верзија на „The Devil Wears Prada 2“.
Свини, која последниве години важи за една од најбараните млади актерки во Холивуд, требало да се појави во кратка сцена во која ја игра самата себе. Нејзиното појавување било планирано на почетокот од филмот, во сцена поврзана со ликот на Емили Чарлтон, кој повторно го толкува Емили Блант.
Според извор близок до продукцијата, одлуката не била донесена поради некаков проблем со актерката, туку од „креативни причини“. Сцената, која траела околу три минути, наводно „структурно не се вклопувала“ во остатокот од приказната. Во неа Свини требало да биде славна клиентка со која соработува Емили, која во продолжението е претставена како дел од светот на луксузната мода.
Иако нејзиното појавување беше очекувано, особено откако минатата година беше фотографирана во близина на сетот, публиката сепак нема да ја види во кино-верзијата. Засега ниту Сидни Свини, ниту Дизни јавно не се огласиле за оваа одлука.
Во филмот се враќаат големите ѕвезди од оригиналот: Мерил Стрип како Миранда Пристли, Ен Хатавеј како Енди Сакс, Емили Блант како Емили Чарлтон и Стенли Тучи како Најџел. Продолжението доаѓа точно 20 години по првиот филм, кој во 2006 година стана вистински моден и поп-културен феномен.
Во Македонија филмот ќе се прикажува под наслов „Ѓаволот носи Прада 2“. Според објавите и страниците на Cineplexx, претпродажбата е веќе активна, а како почеток на прикажување се наведува 28 април 2026, додека во промотивни објави на Cineplexx се споменуваат и проекции од 29/30 април, пред поширокото меѓународно кино-прикажување на 1 мај.
Со други зборови – македонската публика ќе може меѓу првите да го види модното продолжение кое веќе предизвикува реакции, шпекулации и нови холивудски муабети.
