Оливија Родриго во бела тантела покажа како го носиме најромантичниот тренд оваа есен
Не ги собирајте белите фустани: тантелата останува хит и во септември
Ако мислевте дека со крајот на август треба да ги тргнете белите, романтични фустани од гардеробата – почекајте уште малку.
Белата тантела продолжува и во септември, а најдобар доказ за тоа е Оливија Родриго, која покажа како едно типично летно парче може да добие сосема нов, есенски карактер.
Пејачката настапи на фестивалот Daisy Chain Fields во Калифорнија во бел мини-фустан со тенки прерамки, нагласена половина и нежна тантела на долниот дел. Наместо со сандали, го комбинираше со високи кафеави чизми на врзување, со што романтичниот фустан веднаш доби малку побунтовен и есенски изглед.
И токму тука е трикот.
Белата тантела повеќе не мора да изгледа само летно, бохо или „невестински“. Во септември може да се комбинира со кожна јакна, oversized сако, тексас, високи чизми или мокасини и така да стане едно од најинтересните парчиња за преодниот период.
Тантелата, всушност, веќе неколку сезони се враќа во различни форми – на slip фустани, здолништа, топови и парчиња инспирирани од ноќници. За пролетта 2026 модните куќи како Ferragamo, N°21 и Blumarine исто така ја ставија нежната тантела во центарот на вниманието.
Како да ја носиме во септември?
Наједноставната формула е токму онаа што ја избра Оливија: нежен бел фустан + „тешки“ чизми.
За градска варијанта додадете широко сако и голема чанта, а кога температурите ќе паднат уште малку – кожна или тексас јакна.
Резултатот е женствен, но не пресладок; романтичен, но со доволно карактер.
Затоа, пред да почнете со есенското расчистување на плакарот, оставете го белиот фустан со тантела на дофат.
Септември очигледно сè уште не му кажал збогум на белото.
About The Author
