Чија венчаница ќе носи Тејлор Свифт? Модниот свет веќе има неколку фаворити

Додека обожавателите на Тејлор Свифт и Тревис Келси се обидуваат да дознаат каде, кога и како ќе изгледа нивната свадба, модниот свет си има свое прашање: кој дизајнер ќе ја облече најпознатата невеста на годината?

Официјална потврда сè уште нема, но модните инсајдери веќе ги издвојуваат имињата што најмногу би одговарале на стилот на Тејлор – романтичен, женствен, но секогаш со скриена симболика. Vogue објави листа на можни дизајнери, меѓу кои се Ralph Lauren, Vivienne Westwood, Oscar de la Renta/Monse, Schiaparelli и Wiederhoeft.

Ralph Lauren – најамериканскиот избор

Ако некој бренд природно се поврзува со сликата на Тејлор Свифт како „американска невеста“, тоа е Ralph Lauren. Класика, елеганција, префинет луксуз и стил што никогаш не изгледа нападно.

Тејлор веќе носеше Ralph Lauren во фотките од свршувачката, што веднаш го стави брендот меѓу главните фаворити. Токму затоа многумина веруваат дека ако сака безвременска, елегантна и „чиста“ венчаница, Ralph Lauren е најлогичниот избор.

Ова би значело фустан со префинета силуета, скап материјал, минимализам и долг вел – повеќе „вечна класика“ отколку моден експеримент.

Vivienne Westwood – ако сака драматична романтика

Од друга страна, Vivienne Westwood би била избор за Тејлор ако сака венчаница со посилен карактер. Корсет, нагласена силуета, драматичен крој и малку театралност – токму она што одлично се вклопува во нејзината понова естетика.

Тејлор во последниве години често носеше парчиња од Vivienne Westwood, а брендот е познат по венчаници што изгледаат романтично, но не и обично. Модните медиуми ја наведуваат оваа куќа како една од најсериозните опции.

Oscar de la Renta – гламур за црвен тепих

Кога станува збор за раскош, женственост и холивудска елеганција, Oscar de la Renta е име што тешко може да се заобиколи.

Тејлор има носено впечатливи креации од оваа модна куќа на важни настани, а нивниот стил совршено одговара на невеста што сака бајковит, но софистициран изглед. Ова би била венчаница со романтични детали, цветни мотиви, корсет или раскошно здолниште – изглед што ќе биде создаден за фотографии.

Schiaparelli – изненадувањето што би го паметеле сите

Ако Тејлор одлучи да направи моден потег за кој ќе се зборува со недели, тогаш Schiaparelli е најхрабрата опција.

Овој бренд не е класичен bridal избор, но токму затоа би бил интересен. Замислете венчаница што е повеќе уметничко дело отколку традиционален фустан – со скулптурална форма, драматични детали и симболика. Vogue ја наведува оваа куќа како „wild card“ во трката за нејзиниот свадбен изглед.

Wiederhoeft – модерна невеста со корсет

Меѓу можните имиња се спомнува и Jackson Wiederhoeft, дизајнер познат по модерни корсети, невестинска естетика и малку поинаков пристап кон bridal модата.

Ова не би било најочекуваниот избор за главната церемонија, но би можело да биде совршено решение за втор фустан, after-party или некој помодерен свадбен момент.

Ќе носи ли само една венчаница?

Кај славните невести одамна не важи правилото „една венчаница за цела свадба“. Многу е можно Тејлор да има повеќе изгледи – еден за церемонијата, друг за приемот и трет за забавата.

Токму затоа најреално сценарио е: Ralph Lauren за главната венчаница, а потоа нешто посмело од Vivienne Westwood, Oscar de la Renta или Wiederhoeft за вториот дел од свадбата.

Што би ѝ прилегало најмногу?

Ако судиме според нејзиниот стил, Тејлор веројатно нема да избере венчаница што е премногу провокативна или трендовска. Поверојатно е да оди на изглед што ќе изгледа елегантно и по 20 години – со романтичен детал, корсетирана линија, мек бел или ivory тон и симболика која само нејзините фанови ќе ја препознаат.

Засега, сè останува во доменот на модни предвидувања. Но едно е сигурно: кога Тејлор Свифт ќе се појави како невеста, нејзината венчаница ќе стане една од најанализираните во светот.