Се мачкате со скапи кремови, внимавате на негата, а кожата сепак ви е сува, затегната и без сјај? Можеби проблемот не е во козметиката. Дерматолозите предупредуваат дека некои од нашите секојдневни навики, особено во студените месеци, можат сериозно да ја нарушат природната заштита на кожата.
Со доаѓањето на постудените денови, лицето почнува да се однесува поинаку. Кожата се суши, се појавуваат ситни лушпи, црвенило, а брчките стануваат повидливи.
Многумина веднаш посегнуваат по поскап крем, нов серум или дополнителен козметички третман.
Но, дерматолозите од познатата американска клиника Cleveland Clinic објаснуваат дека решението често се крие во промена на неколку сосема обични навики.
Еве кои пет грешки најчесто ги правиме.
1. Се туширате со премногу жешка вода
Нема ништо поубаво од топол туш по студен ден. Но, токму тука се крие една од најголемите грешки.
Премногу жешката вода ги отстранува природните масла што ја штитат кожата, па таа побрзо ја губи влажноста.
Дерматолозите советуваат туширањето да трае од пет до десет минути, а водата да биде млака, наместо жешка.
2. Користите сапуни и гелови што прекрасно мирисаат
Мирисот на ванила, кокос или омилениот парфем во гелот за туширање можеби е пријатен, но не мора да ѝ годи и на кожата.
Производите со додадени мириси и агресивни состојки можат да ја иритираат чувствителната кожа и дополнително да ја исушат.
Особено во зима, дерматолозите препорачуваат нежни средства за миење, без парфем.
УБАВИНАТА ИМА СВОЈ ДАТУМ: Beauty Expo Skopje 2027 најавува три дена гламур, трендови и инспирација!
3. Чекате кожата целосно да се исуши пред да нанесете крем
Ова е грешка што ја прават многумина!
По туширањето, кожата почнува да ја губи влагата, особено ако воздухот во просторијата е сув.
Затоа, дерматолозите советуваат хидратантниот крем да се нанесе во првите три минути по туширањето, додека кожата сè уште е малку влажна.
На тој начин се задржува дел од водата во површинскиот слој на кожата.
За зимска нега особено се препорачуваат кремови со керамиди и други состојки што ја поддржуваат природната кожна бариера.
4. Претерувате со пилингот затоа што кожата ви се лупи
Кога ќе забележиме дека лицето се лупи, првата помисла често е дека треба да ги отстраниме мртвите клетки.
Но, пречестиот пилинг може дополнително да ја оштети веќе чувствителната кожа.
Особено треба да се внимава со силните механички пилинзи и производите со киселини, кои во зимските месеци можат да предизвикаат поголема иритација.
Наместо агресивно отстранување на лушпите, приоритет треба да биде смирувањето и хидратацијата на кожата.
5. Го засилувате греењето, а заборавате на влажноста на воздухот
Сувиот воздух во загреаните простории е еден од најголемите непријатели на кожата во студените месеци.
Кога влажноста на воздухот е ниска, кожата полесно ја губи водата. Последиците можат да бидат затегнатост, чешање, црвенило и испукани усни.
Дерматолозите препорачуваат користење навлажнувач на воздухот, особено во спалната соба, со негово редовно чистење.
И уште една грешка – заборавате на кремот со заштитен фактор!
Многумина мислат дека кремот со SPF е резервиран само за летото и плажата.
Но, ултравиолетовото зрачење е присутно и во текот на зимата, дури и кога надвор е облачно.
Затоа дерматолозите препорачуваат заштита од сонце во текот на целата година.
Малку промени, голема разлика
За здрава и негувана кожа не мора секогаш да потрошите цело богатство.
Пократко туширање, понежни препарати, соодветен хидратантен крем и поголемо внимание на воздухот во домот можат значително да помогнат.
Ако сувоста е проследена со силно чешање, болни пукнатини или црвенило што не поминува, потребна е консултација со дерматолог.
Понекогаш најдобриот третман за убавина започнува со навиките што ќе ги промениме, а не со козметиката што ќе ја купиме.
About The Author
