Што да се појадува денес?

Летото секогаш нè потсетува дека сакаме да се чувствуваме полесно, посвежо и поубаво во сопствената кожа. Но, тоа не значи дека треба да се изгладнуваме, да броиме секој залак или да започнуваме диети што траат три дена и завршуваат со нервоза.

Тајната често е многу поедноставна: денот да започне со паметен, лесен и хранлив појадок.

Појадокот не мора да биде комплициран. Напротив, жените што сакаат да изгледаат средено, да имаат енергија и да не чувствуваат тежина уште од сабајле, најчесто избираат оброци што се брзи, лесни и заситуваат.

1. Грчки јогурт со овошје и малку јатки

Ова е еден од најлесните појадоци за лето. Грчки јогурт, неколку јагоди, боровинки, праска или банана и малку ореви, бадеми или лешници.

Изгледа како десерт, а всушност е одличен утрински оброк. Дава чувство на ситост, не го оптоварува стомакот и е идеален за жени што сакаат нешто слатко, но не премногу тешко.

2. Овесна каша што се подготвува навечер

Овес, јогурт или млеко, малку мед, чиа семе и овошје. Се меша навечер, се остава во фрижидер и наутро е готово.

Ова е совршено за оние утра кога немате време ни да размислувате што да јадете. Само ја вадите чашата од фрижидер и имате појадок што изгледа убаво, заситува и не создава чувство на тежина.

3. Тост со јајце и авокадо

Едно парче интегрален леб, варено или пржено јајце на малку масло, неколку парчиња авокадо и малку сол, бибер или лимон.

Овој појадок е за оние што сакаат нешто „конкретно“, но сепак лесно. Добар е и за денови кога знаете дека ќе имате напорен распоред и нема брзо да стигнете до ручек.

4. Смути, ама не само овошје

Многу жени грешат кога прават смути само од овошје. Така добиваат пијалак што брзо го крева шеќерот, а по еден час повторно се гладни.

Подобра комбинација е: јогурт или млеко, малку овошје, овес, чиа семе или лажица путер од кикирики. Така смутито станува вистински оброк, а не само „слатка течност“.

Кога телото бара решение: приказна за слабеење, хормони и тешки одлуки

5. Варени јајца со домат, краставица и сирење

Класика што секогаш функционира. Две варени јајца, свеж зеленчук и малку сирење. Брзо, едноставно и многу подобро од пециво купено набрзина.

Овој појадок е особено добар за жени што сакаат да избегнат утринска надуеност и пад на енергија.

6. Лесна овошна чинија со протеин

Овошјето е одлично за лето, но најдобро е да не биде само овошје. Додадете јогурт, малку урда, јатки или семки.

Така телото добива и свежина и ситост, а не само брза доза шеќер.

Не почнувајте го денот само со кафе

Кафето е утрински ритуал за многу жени, но ако првото нешто што го внесувате е кафе на празен стомак, можно е да се чувствувате нервозно, гладно или без енергија подоцна.

Не мора да се откажете од кафето. Само додадете нешто мало пред него или заедно со него: јогурт, банана, варено јајце или неколку јатки.