Постојат пријателства што се само за кафе, прошетки и убави фотографии. Но постојат и другарки што ти ја спасуваат душата кога животот ќе стане премногу тежок, кога срцето ќе ти се скрши, кога не знаеш што да облечеш, што да одговориш или дали воопшто да му одговориш.
Женската дружба е посебна терапија. Понекогаш не ти треба психолог, не ти треба совет од интернет и не ти треба уште една мотивациска реченица. Ти треба другарка што ќе те погледне и ќе ти каже:
„Седи. Кажи сè. Јас сум тука.“
Ако во животот ги имаш овие пет типови жени, чувај ги. Таквите другарки се богатство.
1. Другарката што секогаш ја кажува вистината
Ова е онаа што нема да ти каже дека сè е супер ако не е супер. Ќе ти каже дека фустанот не ти стои најдобро, дека тој не те заслужува или дека можеби и ти малку претеруваш.
На почеток можеби боли, но подоцна сфаќаш дека баш таа ти заштедила многу нерви, солзи и погрешни одлуки.
Вистинската другарка не те лаже за да ти биде пријатно. Таа ти ја кажува вистината за да ти биде подобро.
2. Другарката што те смее кога најмалку ти е до смеење
Сите имаме потреба од таква жена во животот. Таа што ќе влезе во соба и веднаш ќе ја промени енергијата. Таа што ќе направи шега и во најтежок момент, не затоа што не ја разбира болката, туку затоа што знае дека мора малку да те извлече од неа.
Со неа плачеш, но секогаш завршуваш со смеење.
И тоа е лек.
Прочитај и за
Дожд, кафе и порака од бившиот: зошто токму вакви денови се јавуваат старите љубови?
3. Другарката што не те осудува
На неа можеш да ѝ кажеш сè. И кога си згрешила. И кога си му пишала, иако рече дека нема. И кога си се вратила на нешто што сите ти рекоа да го оставиш.
Таа не те гледа од високо. Не ти држи лекции. Не те прави да се чувствуваш глупаво.
Само те слуша и ти дава простор да бидеш човек. А тоа денес е реткост.
4. Другарката што те турка напред
Ова е онаа што верува во тебе и кога ти самата се сомневаш. Таа ќе ти каже да аплицираш, да почнеш, да излезеш, да не се откажеш, да се дотераш, да продолжиш.
Не те остава да се смалиш само затоа што некој те повредил или животот те изморил.
Таа не ти дозволува да заборавиш која си.
5. Другарката што е тука и кога нема ништо „интересно“
Највредни се оние пријателства што не постојат само за излегувања, прослави и убави моменти. Вистинската другарка е тука и во обичен вторник, кога си уморна, кога немаш шминка, кога не ти се зборува многу, ама сакаш некој да биде покрај тебе.
Таа не бара спектакл.
Не бара постојано внимание.
Не исчезнува кога не си најзабавната верзија од себе.
И токму затоа е важна.
Жените најдобро знаат колку тежат тивките битки
Некогаш една порака од другарка може да ти го спаси денот. Едно „каде си?“ може да значи повеќе од цел говор. Едно кафе може да биде терапија. Една прегратка може да те состави повторно.
Затоа чувај ги жените што ти носат мир, смеа и вистина. Чувај ги оние што не се натпреваруваат со тебе, туку навиваат за тебе.
Затоа што вистинските другарки не се само луѓе со кои поминуваш време.
Тие се семејство што сама си го избрала.
About The Author
