Жештините не попуштаат, а најтешкиот дел од денот за многумина не е ни пладнето, туку ноќта. Кога собата е загреана, воздухот стои, а перницата за неколку минути станува топла – спиењето се претвора во вртење од една на друга страна.
Но, постои еден стар, едноставен трик кој повторно стана актуелен во деновите на топлотни бранови. Не бара клима, не бара скап уред, а потребен ви е само еден предмет што сите го имаме дома – пешкир или тенка чаршав-плафта.
Трикот е едноставен: навечер, кога температурата надвор ќе почне барем малку да паѓа, отворете го прозорецот и пред него закачете влажен пешкир натопен во ладна вода. На тој начин, воздухот што влегува во собата поминува низ влажната ткаенина и станува посвеж.
Ова функционира на принцип на испарување – водата од пешкирот ја „влече“ топлината од воздухот, па просторијата може да стане попријатна за спиење.
Особено е корисно за спални соби во кои не сакате цела ноќ да работи вентилатор или клима. Вентилаторот може да биде бучен, да ја крева прашината, а кај некои луѓе и да предизвика суво грло или затнат нос.
За подобар ефект, пешкирот не треба да капе вода, туку да биде добро исцеден и влажен. Може да го ставите на закачалка, на стол пред прозорец или на сушара, но внимавајте да не допира електрични уреди или приклучоци.
Дополнително, во текот на денот држете ги ролетните или завесите спуштени, особено ако сонцето директно удира во прозорците. Проветрувајте рано наутро и доцна навечер, а преку ден обидете се да не внесувате дополнителна топлина со готвење, пеглање или користење повеќе електрични уреди.
Мал трик, но во летните ноќи може да направи голема разлика – особено кога сакате барем малку свежина без да ја оставите климата да работи до утро.
About The Author
