Île de Bendor
Свадба како од филм на приватен француски остров: Вел стар 200 години, црвени Manolo чевли и забава до 6 наутро
Режисерката Софи Лејн Кертис и fintech претприемачот Тајлер Питерс приредија свадба која повеќе личи на сцена од европски филм отколку на класична венчавка – приватен остров на Азурниот Брег, драматични карпи над Медитеранот, стотици свеќи, невестински фустан кој ги прекршува правилата и вел стар околу два века. А за сите што ќе се запрашаат „Колку би чинело и ние од Македонија да направиме свадба тука?“ – одговорот е: многу.
Софи и Тајлер се запознале уште во 2016 година преку заедничкиот пријател Брејди Корбет. Првата средба не била љубов на прв поглед, а потоа животот ги однел во различни правци. Шест години подоцна повторно се зближиле, а по концерт на Rolling Stones во Њујорк станало јасно дека меѓу нив постои нешто повеќе. Две недели откако повторно се споиле, веќе живееле заедно.
Запросување во кино
Во јуни 2024 година, Тајлер ја запросил Софи во кино во Њујорк, додека таа мислела дека дошле на техничка проба за иден филмски проект.
На екранот почнале да се појавуваат снимки од местата кои имале посебно значење во нивната врска – местото на првиот бакнеж, омиленото кафе и кадри од нивните патувања.
На крајот се појавило прашањето: „Will you marry me?“
Прстенот бил подеднакво необичен – дијамантски прстен од ковано злато кој датира од 1807 година.
Местото го пронашле сосема случајно
Идејата за свадба на Île de Bendor се родила за време на патување во Марсеј.
Таму слушнале за приватниот остров создаден од Пол Рикар, кој во 60-тите години бил познато боемско собиралиште и место поврзувано со имиња како Салвадор Дали и Брижит Бардо. Кога го посетиле островот додека сè уште траела неговата трансформација во луксузно одморалиште, Софи веднаш почувствувала дека токму таму сака да се омажи.
Таа станала првата невеста што се венчала на островот откако Zannier Hotels го трансформирал во нов луксузен resort. Хотелот официјално се отвори на 1 мај 2026 година по петгодишна трансформација.
Невестински фустан кој намерно не изгледа „совршено“
Софи не сакала класичен bridal изглед.
Наместо вообичаениот бел фустан, таа се обратила кај Dilara Findikoglu, а во текот на пет проби фустанот бил граден директно на нејзиното тело.
Моделот имал видлива корсетна конструкција, а идејата била фустанот да изгледа малку посурово, подраматично и далеку од типичната романтична венчаница. Дизајнот вклучувал и дел од здолништето кој можел да се отстрани кога ќе започне забавата.
Невестата својот изглед го опишала како „Victorian biker chick“.
И тешко дека можела подобро да го опише.
Црвени Manolo Blahnik и вел стар околу 200 години
Наместо бели свадбени чевли, Софи избрала црвени Manolo Blahnik.
Но деталот кој го украл вниманието бил велот.
Станува збор за чипкан вел од 19 век, купен во мала продавница во Notting Hill. Според невестата, велот е стар околу 200 години.
Во комбинација со корсетниот фустан и црвените чевли, целиот изглед бил далеку од сè што очекуваме од традиционална свадба – и токму затоа функционирал совршено.
Свадбен викенд наместо една вечер
Прославата не траела само еден ден.
Прво следувала welcome забава, на која гостите носеле бело, додека Софи се појавила во Valentino фустан од 2001 година и Dior чевли од ерата на John Galliano.
Следниот ден бил резервиран за beach party со тема „Riviera Decadence“, со медитеранска храна, танцување на маси и капење во море.
А дури потоа дошол денот на венчавката.
До церемонијата по карпи, со шампањ во рака
Пред церемонијата гостите се собрале кај статуата на Нептун, а потоа се упатиле по карпестиот брег со чаши шампањ во рацете.
Тајлер ја чекал невестата во Brunello Cucinelli.
Церемонијата ја водел нивен близок пријател, а младенците размениле рачно изработени бурми со сафир и смарагд, избрани така што да одговараат на бојата на нивните очи.
Како песна по церемонијата ја избрале „Wild Horses“ од Rolling Stones – истата песна која одиграла улога во нивната љубовна приказна.
Илјада старински свеќници и атмосфера како Хогвортс
За вечерата била поставена пергола осветлена со стотици свеќи, а на масите имало околу 1.000 старински свеќници.
Самата невеста признала дека атмосферата ја потсетувала на Хогвортс.
На менито имало тартар, bouillabaisse, телешко со црн тартуф, dauphinoise компири и чоколаден тарт. По вечерата следувал огномет, а потоа гостите се преселиле во театар претворен во простор за after-party.
Забавата траела до 6 часот наутро.
А колку би чинела ваква свадба ако некој од Македонија посака да се венча тука?
Еве го делот кој веројатно најмногу ги интересира идните младенци.
Zannier Île de Bendor нема јавно објавен фиксен ценовник за целосно приватизирање на островот за свадба, па за ваков настан се бара индивидуална понуда.
Она што го знаеме е дека resort-от располага со 93 сместувачки единици, а самиот остров има три ресторани, четири барови, кафе, creperie и wellness центар од 1.200 квадратни метри. До островот се стигнува со околу седумминутно возење со брод од Bandol.
Според Travel + Leisure, цените за престој во Zannier Île de Bendor моментално почнуваат од околу 950 долари за ноќ.
Ако направиме само груба математика – 93 сместувачки единици по почетна цена од 950 долари за две ноќи – теоретската вредност на сместувањето може да стигне до околу 176.700 долари, пред да се додадат свадбата, храната, пијалаците, декорацијата, музиката, продукцијата и евентуалното ексклузивно користење на делови или на целиот resort.
Затоа, за свадба од ваков размер со неколкудневна програма, сместување на голем број гости и сериозна продукција, реално е да се размислува за буџет од неколку стотици илјади евра.
Како груба редакциска проценка, 250.000–300.000 евра би можеле да бидат само почетна зона за настан од овој калибар, а крајната сума лесно може да биде значително повисока. Ова не е официјална цена на хотелот, туку ориентациска проценка врз основа на објавените хотелски цени и капацитетот на resort-от.
Значи – да, и младенци од Македонија теоретски можат да организираат свадба на истиот остров, но за точна цена треба директна персонализирана понуда од Zannier Île de Bendor.
А медениот месец? Со Orient Express
По свадбата, дваесетина од нивните најблиски пријатели продолжиле за Париз, додека младенците заминале со легендарниот Orient Express.
Патувањето потоа продолжило низ Верона, езерото Гарда, Доломитите, Сардинија и Корзика.
Од античкиот вел и црвените чевли, преку свадбата на карпи над Медитеранот, до илјада свеќници и забава до изгрејсонце – ова е една од оние свадби кај кои речиси ништо не е класично.
И токму затоа тешко се заборава.
About The Author
