Зендаја како божица со крилја: Фустанот што го чекала две години конечно блесна на црвениот тепих

Кога Зендаја се појавува на црвениот тепих, модниот свет знае дека следува момент за паметење. Овојпат актерката ги надмина и најголемите очекувања, појавувајќи се како вистинска митолошка божица на њујоршката премиера на филмот „Одисеја“.

За свечената вечер, Зендаја избра драматична бела креација од француската модна куќа Matières Fécales, со длабоко деколте, високо откриена нога и огромни пердувести крилја на грбот. Етеричната силуета совршено се вклопи во темата на филмот, во кој таа ја толкува грчката божица Атена.

Сепак, зад спектакуларниот изглед се крие приказна што покажува дека големите модни моменти ретко се случајни.

Зендаја откри дека нејзиниот долгогодишен стилист Ло Роуч ја резервирал креацијата за неа уште пред две години.

„Ло го стави овој фустан на чекање одамна. Мислам дека беше пред две години“, изјави актерката.

Иако креацијата е дел од колекцијата есен 2025 на модната куќа, тимот очигледно уште многу порано знаел дека токму Зендаја е жената која може да ја претвори во вистински момент на црвениот тепих.

Изгледот беше дополнет со повеќе од 30 карати дијаманти од Chopard, впечатливи потпетици и нежна, малку неуредна плетенка. Шминката остана дискретна, дозволувајќи му на фустанот да биде главната ѕвезда на вечерта.

Модните критичари во креацијата препознаа комбинација од ангелска елеганција, античка митологија и авангардна мода. Дел од обожавателите забележаа и симпатична поврзаност со нејзините почетоци на Disney Channel, кога во една епизода од серијата „Shake It Up“ исто така се појави со ангелски крилја.

Но, овојпат Зендаја не изгледаше како девојка маскирана во ангел – туку како вистинска холивудска божица која точно знае како да го запре времето на црвениот тепих.

Уште еднаш докажа дека не е доволно само да облечете впечатлив фустан. Потребни се став, самодоверба и присуство за модата да се претвори во уметност.